Të dashur lexues!
Marrëdhënia e njeriut me sendet bëhet gjithnjë e më e vështirë në një botë me prodhime serie dhe gati imponuese të asaj që quhet “prêt a porter”, e cila nuk të kënaq plotësisht asnjëherë. I lodh sytë nëpër dyqane dhe nuk e gjen atë që dëshiron, ose mund të mbushësh çantat plot dhe përsëri s’ke blerë asgjë nga ajo që doje. Ke dëshirë të bësh diçka vetë me duart e tua, por është një terren që nuk e njeh, të alarmon ideja që t’i mund të bësh një veshje. Ose, kur nuk guxon ta bësh që nga e para, mund të ndërhysh mbi një veshje të gatshme duke e transformuar dhe duke e sjellë sipas shijes tënde personale (dhe kjo mund të mos ndodhë vetëm me veshjet…). Qepni vetë funde, fustane me fantazi; sajoni aksesorë, mbulesa të gëzueshme, mbajini ngjyrat sipas shijeve tuaja. Edhe në ato veshje që keni blerë në dyqane mund të vini diçka të re që do t’ju pëlqejë. Realizoni me duart tuaja gjëra që me të vërtetë ju përkasin.

Dikur të gjitha gratë dhe vajzat nuk shqetësoheshin për të gjetur kohën për të qepur dhe qëndisur, sepse ishte pjesë e jetës së tyre. Sot është ndryshe, jeta është bërë më e shpejtë dhe koha për të prerë e qepur nuk gjendet dhe aq lehtë, sidomos kur butikët janë të mbushur plot e përplot me artikuj nga të gjitha anët e botës dhe nga të gjitha stilet, duke e ngushtuar dëshirën për t’u marrë me krijimin e një veshjeje nga vetë ju. Dhe diçka që nënat tona dinë ta bëjnë shumë mirë, vajzat nuk e dinë më. Nëse dje ishte një domosdoshmëri, sot është kthyer në luks, një hobi ose për të kaluar kohën dhe si e tillë nuk sjell para në dorë, përveçse kënaqësi për të krijuar diçka që e dëshiron. Për një pjesë njerëzish është diçka e largët që nuk u përket, për të tjerë është bërë pjesë të jetës dhe e edukimit të tyre.
Duke dashur t’u vijmë në ndihmë të gjithë atyre që do të donin të merrnin disa njohuri fillestare, po hapim një rubrikë mbi veshjet dhe mënyrën se si t’i sjellim ato sipas dëshirave tuaja.

Do flasim mbi modën, stilin, ngjyrat dhe morfologjinë e trupit, për t’ju ndihmuar në krijimin e një vizioni mbi modën, modelizmin dhe prerjet. Stilimi dhe prerja janë të lidhura shumë ngushtë me njëra-tjetrën, ndaj do t’i shikoni shpesh të trajtuara së bashku. Përpos këtyre, do shqyrtojmë disa teknika të detajeve të veçanta në qepje, sepse kjo është cilësia e punës nga ku varet eleganca e veshjeve. Këtu nuk bëhet fjalë për “qepjen e shpejtë”, por për një qepje të kujdesshme, prej së cilës produktet nuk do të japin kurrë përshtypjen e të qepurit në shtëpi nga një amator me talent të diskutueshëm. Nëse do të vendosni të filloni, mësojeni që në fillim se qepja ha kohë dhe vëreni vath në vesh: ju nuk do të bëni një fund të bukur në dy orë dhe vetëm me tre prerje që do t`i keni ildisur për t’i qepur. Ju duhet të bëni në fillim kallëpin, duke u nisur nga kallëpi bazë. Pastaj ju duhet të prisni copën, pasi keni përgatitur kallëpin, duke respektuar me saktësi vijën e shënjimit. Më pas duhet të shënoni ku duhet të kalojë tegeli, ta qepni, ta provoni, ta verifikoni, ta shqepni, ta ribëni dhe të bëni mbylljen. Duhen rreth tetë deri në dhjetë orë punë për të realizuar një fund të thjeshtë, por në fund të këtyre orëve ju do të keni realizuar një veshje me cilësi, të cilën do të keni dëshirë ta vishni. E njëjta gjë do të ndodhë nëse doni të rinovoni një veshje të vjetëruar nga garderoba juaj, duke e sjellë të re dhe të freskët sipas modës së vitit apo stinës dhe sipas shijeve tuaja.
Do të përpiqemi të paraqesim punimin e detajeve të veçanta, të cilat nganjëherë janë të mundimshme, si montimin e xhepave, hekurosjen, kapakët e mëngëve, përgatitja e filetave, edhe pse shumë e limituar, duke marrë parasysh gamën e gjerë të modeleve, por megjithatë do ndalemi në disa prej modeleve më të përdorshme dhe juve ju mjafton thjesht t’i adaptoni sipas shijes suaj personale.
Arti i prerjes dhe i qepjes është dhe art i krijimit. Secili prej jush do të mësojë se një veshje duket e bukur në atë ambient për të cilin është modeluar. Ju do të mësoni shumë shpejt të perceptoni strukturën e një veshjeje. Ky përmirësim vështrimi do të bëhet pak e nga pak. Zhvillimi i aftësive tuaja vizuale do t’ju lejojë të organizoni dhe realizoni çdonjërën prej këtyre veshjeve.
Përshkrimi i një pune me dorë është i vështirë të bëhet, megjithatë do përpiqem ta bëj sa më të prekshme dhe, nëse diku nuk është shumë e qartë, ju kërkoj të falur, por, nëse ka ndonjë detaj të pakapshëm, ju rekomandoj të merrni një veshje të gatshme dhe të shikoni me vëmendje montimin e detajit që ju shqetëson.
Nuk do të lëmë pa studiuar edhe disa nga krijimet më të bukura popullore, duke dashur t’ua risjellim si objekte shumë të mira frymëzimi për të nxitur fantazinë tuaj krijuese. Mbështetur në këtë art të pafundëm, çdokush mund të përdorë detaje nga më të imtat deri tek më të ndërlikuarat, për të sjellë veshje që do të dukeshin po aq të bukura sa edhe në vitrinat më me emër. Për t’u hedhur në këtë aventurë të bukur kijuese, nuk është e nevojshme të njihni emrat më të mëdhenj të modës, as të shkëlqeni në përdorimin e gjilpërës apo lapsit. Ne do t’ju ndihmojmë të zbuloni disa sekrete, duke e nisur me hapa të thjeshtë, por sistematikë.
Duhet vetëm pasion dhe entuziazëm nga ana juaj.

English Contents & Different Editorials of the Journal