Nr. 2, (47) Shkurt 2005

ARKIVAT

FAMILJA 2004, Nr. XIII

FAMILJA 2004, Nr. XII

FAMILJA 2004, Nr. XI

FAMILJA 2004, Nr. x

FAMILJA 2004, Nr. ix

FAMILJA 2004, Nr. VIII

FAMILJA 2004, Nr. VII

FAMILJA 2004, Nr. VI

FAMILJA 2004, Nr. V

Bardhë e zi

 Kuptimi i jetës

  “Thuaj: “O robërit e Mi, që e keni ngarkuar veten tuaj me shumë gabime, mos e humbni shpresën ndaj mëshirës së Allahut, se Allahu i fal të gjitha mëkatet! Ai fal shumë dhe është mëshirues. Kthehuni te Zoti juaj dhe përuljuni Atij para se t’u vijë dënimi, se pastaj nuk do të ketë kush t’ju ndihmojë. Përmbajuni më së mirës që ju është shpallur nga Zoti juaj, para se t’ju vijë dënimi befas e ju të mos e dini. E të mos thotë ndokush: “O, i mjeri unë që kam lënë mangut respektin ndaj Allahut e që kam qenë një prej atyre që talleshin! Ah, sikur të më kishte udhëzuar Allahu (në rrugë të drejtë) e të kisha qenë prej atyre që janë të ruajtur! Apo kur ta shohë dënimin do të thotë: “Sikur të isha kthyer edhe njëherë e të isha bërë prej atyre bamirësve! Jo, ty të patën ardhur argumentet e Mia, e ti i përgënjeshtrove ato, u bëre kryeneç dhe ishe prej atyre që nuk besuan.” (39: 53-59)

Filmi dokumentar amerikan që flet për historinë e profetit Muhamed (a.s) nxiti një interesim të madh në rrethet amerikane, që në prezantimin e tij të parë. Kjo është hera e parë që një stacion zyrtar me përhapje të gjerë në Shtetet e Bashkuara të Amerikës, pikërisht stacioni PBS, shfaq një film që flet për biografinë e Profetit (a.s), në mënyrë të detajuar. Filmi është përgatitur nga Majkëll Wolf dhe Aleksandër Kronimir. Përgatitja e tij mori tre vjet kohë. Xhirimi i tij kishte mbaruar përpara ngjarjeve të 11 shtatorit, por plotësimi dhe prezantimi i tij u vonuan për shkak të kërkimit të hallkës që mungonte, e cila do të lidhte ngjarjen e shtatorit me personalitetin pozitiv musliman. Me të vërtetë, ata arritën të gjenin shembullin që kërkonin. Ai ishte Kevin Xhejms, një zjarrfikës amerikan musliman që ndihmoi në shpëtimin e viktimave të ngjarjes së njëmbëdhjetë shtatorit.

Mbështetja më e madhe e tij ishin disa takime me specialistë muslimanë. Midis tyre ishte edhe thirrësi islam amerikan Hamza Hanson.

Filmi prek dhe flet për dallimin që ekziston mes xhihadit dhe dhunës. Thirrësi Hamza Hanson sqaron se xhihadi u bë detyrim trembëdhjetë vjet pas pikënisjes së thirrjes islame.

Kjo erdhi si pasojë e persekutimit të muslimanëve. Muslimanët u luftuan, sepse pranuan Islamin. Karin Armstrong shton e thotë: “Kurani, në shumë ajete, e ndalon vrasjen. Ai (Kurani) është kundër fillimit të luftërave, duke veçuar vetëm rastet kur përpara muslimanëve nuk mbetet zgjidhje tjetër, përveç luftës si: në rast padrejtësie apo rreziku për thirrjen islame. Xhihadi, në terminologjinë islame, ndahet në dy pjesë: xhihadi i madh, lufta me veten, për t’u larguar nga veset e këqija dhe xhihadi i vogël, beteja kur kushtet e muslimanëve e bëjnë atë fakt të pakundërshtueshëm.”

Ajo që tërhoqi më shumë vëmendjen ishte faqja e posaçme në internet. Ajo përmbante hollësira të shumta për fenë islame dhe biografinë profetike.

Kjo pjesë u hap me fjalën e Karin Armstrong rreth Israsë dhe Miraxhit, ashtu siç përmendet në Kuran, duke e lidhur atë me takimin e Profetit (a.s) me pjesën tjetër të profetëve. Kjo shpjegon këndvështrimin islam për fetë e tjera e që mund të përmblidhet me fjalët: çdo popull ka pasur profetin e tij dhe të tërë profetët bashkohen në të njejtin mesazh. Kurani përmend emrat e disa profetëve si: Ademin, Jusufin, Jakubin e Musën (a.s). Gjithashtu ajo përqendrohet në zbritjen e një sureje të plotë që flet për historinë e Merjemit dhe Isait (a.s), duke treguar dallimin mes muslimanëve dhe të krishterëve.

Folësi fillon me Islamin si një prej feve më në rritje në botë e në mënyrë të veçantë në Shtetet e Bashkuara të Amerikës. Numri i muslimanëve atje arrin në rreth 10 milionë, ndërkohë që statistikat zyrtare amerikane e kufizojnë në rreth gjashtë milionë. 50 % e muslimanëve në Amerikë përbëhet nga emigrantë, e shumica e tyre janë nga shtetet e Azisë, ku 30-45 % e tyre janë nga Afrika. Filmi flet për këndvështrimin e këtij numri muslimanësh në Amerikë, për Profetin (a.s), si burimin kryesor të projektimit të kontureve të jetës, marrëdhënieve dhe ritualeve të tyre fetare, duke vënë në dukje sfidat dhe presionet që ata po përjetojnë pas ngjarjes së njëmbëdhjetë shtatorit të vitit 2001. Nuk mungon as mendimi i popullit amerikan për ta.

Filmi i drejton gishtat e akuzës drejt varfërisë, injorancës dhe mendimeve të gabuara që rrethojnë muslimanët në vende të ndryshme të botës dhe si pasojë e tyre dalin veprime të gabuara. Këto veprime nuk janë pjesë e fesë islame.

Filmi prezanton jetën e familjes muslimane, duke e dhënë nëpërmjet jetës së një nëne dhe vajzës së saj. Nexhah Bazi, një infermiere që lindi dhe jeton në Shtetet e Bashkuara të Amerikës, si dhe vajzës së saj, Nadjas, e cila ka zgjedhur të veshë hixhabin, pa ndonjë ndikim apo presion të drejtpërdrejtë nga prindërit. Ajo e konsideron atë si detyrim, që në vetvete përmban një urtësi për  gruan.

Filmi flet edhe për këndvështrimin e Islamit ndaj gruas, e cila në shekullin e shtatë nuk kishte asnjë të drejtë, madje edhe në Gadishullin Arabik, ku u shfaq fenomeni i varrosjes gjallë të vajzave. Ai sqaron qëndrimin e Islamit ndaj saj. Kjo fe ka ardhur me paralajmërim për atë që prek jetën e femrës, duke e nderuar e duke e konsideruar të barabartë me burrin në të drejta e detyrime përpara Allahut. Kjo konsideratë shkon më tej, kur asaj iu dha e drejta e kushtëzimit në aktin e martesës dhe e drejta e kërkimit të divorcit. Nuk mund të harrohen hadithet dhe orientimet profetike, të cilat vërtetojnë nderimin që Islami i ka bërë gruas. Mund të përmendim thënien e Profetit (a.s): “Xheneti është nën këmbët e nënave.”

Faqja e internetit sqaron marrëdhënien shembullore të Profetit (a.s) me gruan e tij, Hatixhenë, Allahu qoftë i kënaqur prej saj.

Ajo ishte e para që i tregoi për Revelatën hyjnore që i zbriste atij.

Megjithëse shumica e meshkujve në Gadishullin Arabik në atë kohë ishin të martuar me më shumë se një grua, Profeti (a.s) qëndroi me një grua te vetme. Filmi e justifikon poligaminë në jetën e Profetit (a.s), pas vdekjes së saj, me nevojën për thirrjen islame, si dhe me ndërtimin e shoqërisë islame. Gjithashtu, numri i grave të tij ka qenë edhe për arsye politike, ku në krye qëndronte vëllazërimi mes fiseve, pasi përhapja e luftërave kishte bërë që ata të dobësoheshin. Por ai vë në dukje që legjitimiteti i poligamisë në Islam është i kushtëzuar me drejtësinë dhe mundësinë financiare. Filmi vazhdon më tej me historinë e Aishes, Allahu qoftë i kënaqur prej saj, e cila u bë burimi i parë i përhapjes së diturisë profetike tek gratë, e shoqëruar me orientimin e Profetit (a.s).

Islami dhe hebrenjtë

Karin Armstrong flet për këndvështrimin islam ndaj hebraizmit duke thënë: “Islami në asnjë mënyrë nuk thërret për armiqësi ndaj hebraizmit apo hebrenjve. Përkundrazi, Kurani fton muslimanët të besojnë librat e tjerë qiellorë që kanë ardhur para tij, si dhe urdhëron për një trajtim të mirë të ithtarëve të librave qiellorë, përkundër idesë së përhapur ndër ne, që Islami është fe armiqësore e që nuk i pranon jomuslimanët”.

Gjithashtu faqja e internetit flet për marrëdhëniet mes hebrejve e muslimanëve në qytetin e Medines. Konteksti dramatik i kësaj pjese të filmit, që flet për fillimet e Islamit në Medine, vërteton respektin e shumë hebrenjve për thirrjen profetike dhe gjykimin e drejtë të tyre. Filmi shfaq shkaqet që bënë hebrenjtë të refuzonin profetësinë e Muhamedit (a.s). Në  atë kohë thuhej se profeti i fundit që do të vinte do të ishte nga mesi i tyre. Kjo bëri që priftërinjtë të thërrisnin se ky profet patjetër duhet të jetë nga vetë hebrejtë e jo nga arabët. Filmi demonstron arsyen dhe thotë se tërë luftërat dhe konfliktet që shpërthyen mes muslimanëve dhe hebrenjve në atë kohë kanë qenë pasojë e besëtytnive, traditave fisnore e shoqërore që sundonin në atë pjesë toke, ku ishte e prerë që individi t’i qëndronte besnik fisit të tij dhe të ruante me fanatizëm atë që kishte trashëguar.

Si u bë musliman Majkëll Wolf

Hamza Hanson, është amerikani që pranoi Islamin dhe ia kushtoi jetën thirrjes islame, themeluesi i akademisë “Zejtuna” në Shtetet e Bashkuara të Amerikës. Kjo akademi ka për qëllim ringjalljen e trashëgimisë islame dhe përkthimin e shumë librave fetarë në gjuhën angleze.

Hulumtuesja e shquar britanike Karin Armstrong, e cila më parë ka qenë murgeshë deri në momentin që doli nga kisha për të studiuar tërë fetë, flet me dhembje për ngjarjet e njëmbëdhjetë shtatorit. Ajo ka një numër shkrimesh ku sqaron përpara botës perëndimore të vërtetën e Islamit.

Së fundi, ideatori i kësaj vepre dhe njëri prej realizuesve të tij është Majkëll Wolf, i cili para kësaj pune bëri një prezantim të udhëtimit të Haxhit, të shfaqur nga kanali CNN. Përshtypjet e udhëtimit i hodhi në një prej librave të tij. Në të flet për historinë e pranimit të Islamit, pasi qe rritur mes prindësh jo muslimanë, babain hebre dhe nënën të krishterë. Në shënimet e tij ai thotë: “Pas njëzet e pesë vjetësh pune si shkrimtar në Shtetet e Bashkuara të Amerikës fillova të interesohesha për të diskutuar disa çështje, sidomos për ndryshimet fetare dhe fanatizmin fetar. Kështu që vendosa të jetoja në Afrikë mes grupesh arabe, berbere dhe europianëve muslimanë. Gjëja e parë që më tërhoqi vëmendjen ishte që ky grupacion nuk u përpoq të njihte nacionalitetin, mendimin apo pamjen time, por thjesht më pyetën për përkatësinë time fetare. Aty kuptova se tek ata, baza për vlerësimin e një personi ndryshonte në varësi të fesë. M’u kujtuan leximet që kisha bërë për Islamin. Ato thoshin që Islami eleminon tërë dallimet me bazë rrace e materiale që sundojnë sot në botë. E pëlqeva Marokun më shumë se të tjerët dhe ndjeva që unë po kërkoja një formë të re jete, që mund të ishte plotësisht e ndryshme nga ajo që isha rritur. Po kërkoja një ekuilibër mes shpirtit dhe trupit, një lidhje që nuk ndan mes natyrës njerëzore dhe detyrave fetare, që nuk bie në kundërshtim me lirinë. Me fjalë të tjera, nuk e ndan fenë nga dija dhe jeta.

Sa më shumë njihesha me Islamin, aq më shumë e ndieja bukurinë e tij. Kjo ishte edhe ideja për të cilën fliste një prej dijetarëve të perëndimit, duke thënë për Kuranin dhe dispozitat e tij: “Sado që ne të përparojmë në sistemet tona mësimore, në mënyrën e të menduarit e të të folurit, do të mbetemi të dobët për t’i kapërcyer ato, apo të dalim me mësime të tjera më të mira se to.

Unë e pranova Islamin, pasi e kuptova thellë këtë fe shembullore.

Ndërsa për realizimin filmik të udhëtimit  të tij të Haxhit, thotë: “Duke qenë që unë jam shumë i apasionuar pas udhëtimeve, sezoni më i rëndësishëm i udhëtimit tim, pas pranimit të Islamit, ishte vizita e Mekës së nderuar. Ajo u planifikua në muajin e Ramazanit, të cilin nuk e ndan nga Haxhi veçse dy muaj. U përgatita për xhirimin e Haxhit dhe shfaqjen e tij nëpërmjet kanaleve më të shquara satelitore, që ajo t’i arrinte botës perëndimore dhe jomuslimanëve.”

Për filmin e fundit dokumentar rreth jetës së Profetit (a.s), Wolfi thotë: “Kjo është puna për të cilën ka ëndërruar e ëndërron çdo rregjisor. Ne kemi paraqitur në këtë dokumentar historinë më të rëndësishme të jetës së një personi. Por unë në realitet ia drejtoj këtë histori popullit amerikan, jomuslimanëve, të cilëve nuk u është dhënë rasti ta dëgjojnë saktë atë. Dëshiroja që t’ia prezantoja shoqërisë sime fenë time të vërtetë. Dëshiroj akoma që personaliteti im të shkrihet plotësisht me këtë fe. U jap përgjigje të gjithë atyre që sulmojnë ndryshimin tim në fenë islame: Unë nuk kam bërë tregti me identitetin tim amerikan. Kërkova kuptimin e jetës dhe e gjeta atë në Islam, kështu që e përkrah atë me  besim e bindje.

Mersila Vodha