Brenda familjes

NË PRITJE TË BEBIT

Iris HOXHA

Ardhja e bebit në jetë është një kënaqësi, si për prindërit, ashtu edhe për pjesëtarët e tjerë të familjes. Por mund të ndodhë që jo gjithmonë kjo kënaqësi të shfaqet. Ajo mund të mbahet brenda shpirtit, duke u shtypur nga frika se a do jetë një nënë e mirë dhe a do t’i shërbejë si duhet bebit të vogël. Studimet e psikologjisë së paralindjes theksojnë se nëntë muajt e shtatzënisë janë thelbësore për raportin nënë - fëmijë, i cili do të pasqyrojë gjallërinë dhe bukurinë e lidhjes së krijuar gjatë shtatzënisë.

Për këtë arsye është e domosdoshme që t’i kushtohet vëmendje fëmijës, para se ta keni në krahët tuaj. Pra, të krijoni një dialog të plotë me të, të përbërë nga emocione dhe ndjenja. Çdo çast në shtatzëninë e gruas ka rëndësinë e tij. Një nënë e ardhshme gjithmonë përballet me pyetje të tilla, si: Me çfarë të ushqehet? Me çfarë të vishet? Çfarë medikamentesh mund të përdorë? Sa kohë mund të punojë? Sa kohë i duhet të pushojë? Sa kohë të merret me sport? Si të përgatitet për lindjen e bebit? Pyetje të tilla mbysin e torturojnë një grua shtatzënë dhe përgjigjet vijnë nga të gjithë burimet e mundshme të këshillave, si: botime të specializuara, revista, mikesha, të afërm, etj. Por duhet pasur kujdes, pasi jo të gjitha këshillat janë të vlefshme për të gjitha gratë shtatzëna, pasi çdo shtatzëni është histori më vete dhe e veçantë, pasi të qenit nënë është një përvojë e papërsëritshme. Nuk ka rregulla të përgjithshme që të gjejnë zbatim, por ka zgjedhje që bëhen të specifikuara rast pas rasti, rregullat janë thjesht referuese. Më e rëndësishme për një mama është raporti i brendshëm, një lidhje e brendshme thellësisht shpirtërore mes nënës dhe bebit deri në thellësinë më të vërtetë të shpirtit. Ndodh shpesh që një nënë shtatzënë të zbatojë rregulla të forta në lidhje me veshjen, ushqyerjen, etj, që kanë të bëjnë me shëndetin fizik të saj, duke i krijuar një ndjenjë pakënaqësie e papërshtatshmërie me veten. Ndoshta duke iu referuar rregullave dhe duke ndjekur “instiktin e nënës”, një nënë arrin të gjejë mesataren e artë, atë që është më e mira për të dhe fëmijën e saj në çdo moment. Duhet të mësosh të dëgjosh vetveten, pasi shtatzënia është një moment intim e thellësisht personal dhe më shumë se çdo përvojë tjetër të jep mundësinë të hysh në kontakt me thellësinë e vetvetes. Jo rrallë herë na takon të dëgjojmë për ndjeshmërinë e një gruaje shtatzënë, për dëshirën e saj, për të qëndruar vetëm e për të gjetur vetveten, ky është konfirmim i nevojës së padiskutueshme që ka një nënë: “Për të humbur në vetvete, me qëllim që të gjejë përgjigje për pyetjet dhe dyshimet e veta”. Në nëntë muajt e shtatzënisë duhet që çdo nënë të pasqyrojë feminilitet, duke i kushtuar një rëndësi të madhe çdo elementi të jetës së saj, duke filluar me flokët, veshjen, të folurin apo sjelljen. Gjatë 9 muajve të shtatzënisë lirshmëria e rrobave është një kërkesë shumë e rëndësishme për nënat.

Përgatitja e valixhes për në spital   

Për të porsalindurin

Në rast se kemi të bëjmë me një lindje normale, qëndrimi në spital shkon tri ditë dhe në këto tri dite nëna duhet të këtë përgatitur më parë:

- 3 komplete të veçanta veshjeje për bebin;

- 3 bluza ose badi intim pambuku për në verë dhe bluza apo badi prej leshi për dimër;

- 3 këmisha me kopsa prapa;

- 3 palë çorape të buta;

- 3 palë tuta;

- 3 palë mbathje;

- garza për të pastruar herë pas here kërthizën;

- pampers;

-1 mbulesë pambuku, kur është verë dhe prej leshi kur është në dimër;

- vaj, pomadë për të lyer bebin, nëse ai ka ndonjë skuqje;

- kapuç;

- dhe një arush për bebin.

Për nënën:

- Një kartelë, e cila përmban të gjitha analizat e bëra gjatë periudhës së shtatzënisë;

- dokumentet personale;

- 3 këmisha nate të hapura përpara;

- 1 rrobdishan pambuku ose leshi, nëse është dimër;

- 1palë shapka të rehatshme;

- 1 golf të hapur;

- 2 palë recipeta apostafat për nënat me gji;

- 1 pako me facoleta të dezinfektuara për të pastruar gjirin para dhe pas çdo pirje të bebit;

- 1 palë korse;

- 1 qese për rrobat e palara;

- 2 palë çorape pambuku;

- 1 detergjent intim;

- aparat fotografik ose kamera.

Shtatzënia të bën më të bukur

Komplimentet që marrin nënat e ardhshme në harkun kohor të 9 muajve janë të shumta. Një grua, e cila është në muajt e shtatzënisë, është më e freskët, shkëlqen më shumë fytyra dhe sytë e saj. Kjo ndodh, sepse fytyra bëhet më e butë dhe më e çlodhur, rrudhat fillojnë të mos duken më, pasi  pesha e trupit të gruas rritet. Gjatë këtyre muajve edhe flokët bëhen më të shkëlqyeshëm dhe më të butë. Zemra e një gruaje shtatzënë pompon më shumë gjak dhe kjo përmirëson qarkullimin e gjakut nëpër damarët, prandaj edhe në fytyrën e tyre shfaqet një shkëlqim i veçantë.

Por, nuk duhet të harroni se gëzimi i një gruaje të re, që është në pritje të bëhet nënë është trajtimi më i mirë kozmetik që është shpikur.

Kujdesi që i bëhet bebit përpara se ai të vijë në jetë

Nga studimet thuhet se aparati i dëgjimit të fëmijës fillon të krijohet qëkur ai është 8 javësh, ndaj është e këshillueshme që nënat t’i vënë në sfond një muzikë të lehtë me tonalitet dhe volum të ulët. Kjo gjë i dhuron fëmijës momente qetësie. Kjo është gjithashtu e nevojshme që fëmijën ta zërë gjumi, pasi ai të ketë lindur. Por më shumë se muzika, e rëndësishme është zëri i nënës, i cili arrin në fetus 3 herë më shpejt se të gjithë tingujt e tjerë. Flitini fëmijës suaj, duke filluar ta thërrisni në emër n.q.s ia keni gjetur dhe nëse jo thërriteni me fjalë të ëmbla. Kjo gjë do të bëjë që bebi të njohë zërin tuaj dhe menjëherë sa ai të lindi do t’ju njohë menjëherë nga zëri, duke e dalluar nënën e tij nga të gjithë të tjerët që mund të gjenden në atë sallë.

Por jo më pak e rëndësishme janë edhe përkëdheljet. Nëna duhet ta përkëdhel bebin e saj, duke ledhatuar (fërkuar) barkun e saj. Kjo formon një lidhje të drejtpërdrejt midis tyre dhe kur bebi të jetë 7 muajsh, ai do ta ndiejë këtë përkëdhelje.

English Contents & Different Editorials of the Journal