Bazime astronomike për ritet dhe festat islame

Punime të Dr. Ibrahim Gashit
Përveç shkrimit të shumë artikujve metodikë e shkencorë për lëndët matematikë e astronomi, ka botuar këto libra:
-Probleme të zgjidhura astronomike, Tiranë 1972;
-Nga qielli ynë, Lubjanë 1995;
-Ditënata dhe disa kuptime që lidhen me të, Tiranë 2002;
-Kalendari dhe kronologjia në botë dhe tek shqiptarët, Tiranë, 2000;
-Kalendari dhe hixhri hënor dhe lidhja e tij me kalendarët Julian e Gregorian dhe me periodën Juliane”, Tiranë, 2003;
-Kalendari MALI RUMI dhe lidhja e tij me Kalendarin Gregorian dhe me periodën Juliane”, Tiranë, 2003;
-Bazime astronomike në ritet dhe festat fetare islame, Tiranë 2005.
Ka gati për botim edhe tre libra të tjerë, dy prej të cilëve lidhen me Kronologjinë Shqiptare dhe njëri me çështje të Ballkanit të trazuar pas vitit 1993, kur punoi si sekretar ambasade i Republikës së Shqipërisë në Slloveni.

Dr. Ramiz Zekaj
Njohja e mirë e astronomisë, në veçanti e fushës së kalendarëve dhe të kronologjisë nga ana e autorit, bëri që ai të na paraqesë lëndën e trajtuar jo vetëm si një studim shkencor me bazimin përkatës teorik, por edhe si një pasqyrim të kulturës islame në disa prej dimensioneve të saj në këtë fushë.
Në libër shtrohen para lexuesit tri çështje themelore lidhur me ritet dhe festat fetare islame:
E para, përcaktimi kohor i riteve dhe festave fetare islame vjetore, të cilat kanë lidhje me përcaktimin e datës një të muajve të kalendarit Hixhri Hënor, përkatësisht me dukjen për herë të parë të draprit të Hënës së re pas perëndimit të Diellit.
E dyta, përcaktimi kohor i pesë faljeve ditore, për të cilat bëhen edhe kalendarët-takvimë, është trajtuar nga autori në të gjitha aspektet e tij, pasi janë dhënë njohuri të plota astronomike, lidhur me kohën e lindjes, të perëndimit dhe të kulmimit të Diellit, të fillimit e të mbarimit të muzgjeve, çaste kohore këto që përcaktojnë edhe intervalet kohore kur mund të kryhen faljet.
E treta, përcaktimi i drejtimit të Kiblës (Mekës), domosdoshmëri kjo për çdo musliman që kryen faljet, është trajtuar në mënyrë teorike, si dhe janë përcaktuar drejtimet e shumë qyteteve shqiptare dhe të huaja. Këtu mendoj se lind nevoja e një studimi për drejtimin që kanë xhamitë e ndërtuara më parë apo xhamitë që po ndërtohen në kohët e sotme.

Prof. Dr. sc. Musa Gashi
Prof. Dr. sc. Ejup Hamiti
“...Të hartuarit e këtij studimi-projekt paraqet, pikësëpari, një vepër shkencore pioniere tek ne, në të cilën autori, si njohës i mirë i matematikës dhe astronomisë, këtë rrafsh të njohurive shkencore e fetare e shtron me plot sukses, duke iu drejtuar opinionit të gjerë të Shqipërisë dhe arealit shqipfolës në Ballkan, sidomos të Kosovës, Maqedonisë, Malit të Zi dhe Çamërisë. Në këtë kontekst, lind pashmangshëm edhe sugjerimi ynë për organet kompetente të Bashkësive fetare muslimane të Shqipërisë dhe zonave të tjera të cekura më sipër, që me seriozitetin e duhur ta studiojnë këtë vepër shkencore dhe të mbajnë qëndrim pozitiv, lidhur me sendërtimin e ideve që shtrohen atje”.

Shprehim bindjen se libri “Bazime astronomike për ritet dhe festat fetare islame” i autorit Dr.Ibrahim Gashi, do të ngjallë tek lexuesi interes njohës për çështjet e trajtuara, e njëkohësisht do të nxisë studiuesit e rinj për hulumtime të mëtejshme astronomike në këtë fushë, e cila akoma nuk është lëvruar sa duhet nga studiuesit dhe njohësit e saj tek ne.

English Contents & Different Editorials of the Journal