Pa tabu

Flutura AÇKA

Hipokrizia

Kthehesh majtas, jep dorën,

djathtas uron

puth kë s’di,

kë s’di përqafon.

Pi kafe, flet për ndershmëri,

morali,

etalon në njësinë e matjes

së shpejti do të hyjë.

Buzëqesh,

trishtohesh,

mes të qeshura idiotësh

dhe përkëdhel,

me dorën për shuplakë

prej kohësh.

Mes dashurisë

e fyerjes

luan me nervat

tona

një maskë hibride.

O Zot, ndihmomë

mos vdes hipokrite!

Etje e pasosur

Me puthje

ndërtuam

kështjellë –dashurinë.

I murosëm fjalët,

brinjët,

lotët,

të gjitha marrëzitë.

Frikur,

muret mos binin,

jashtë pa nxjerrë lamë

njërin gji.

Sillemi rrotull gurëve,

eshtrave,

syve,

buzëve, rrotull

etjen

ku ta shuajmë

s’dimë.

Pa titull

Nga kafka e hapur

në mesnatë,

vlojnë të fundmen mbeturina

të mendimit.

Nga lodhja

dhe dëshira të fle,

pa titull e lashë

poezinë e vlimit.

Ndoshta do të gjendet

diçka,

për ta mbushur kafkën

pas zgjimit...

Ritual i vjetër

Nën zë flasin,

flasin,

flasin,

flasin.

Ata.

Dykëmbësha,

njëkokësh.

Nën zë,

pa zë.

Ata.

Një,

njëqind,

njëmijë, si ta.

Unë eci bri tyre,

indiferente,

në ritualin tim të vjetër,

pa ditur

ç’tu bëj tjetër.

Zbrazur

E heshtur kjo dhomë e zbrazur,

si varr vdes-ikur.

Zgavrës fëshfërijnë

fasha kujtimesh, varur pabesisht

në prag të një feste,

që s’dihet kur do të vijë.

Braktisja,

hartë në mur

po ronitet

nga frëngjitë dritare.

Dita e kryqëzuar shembet

në boshllëk,

rrëshqet

I vdekur pluhuri nga vitet,

prehur gëzimthi në shtratin e vet.

Asnjë gjurmë

jetës nuk i mbetet,

në këtë gojë memece,

që s’di të rrëfehet.

Hapësira e plakur lakohet në skuta,

pa fill e pa fund,

ndërsa këmborë e zërit jashtë

në këtë festë vajtimi,

rrëmujën tund.

Bufonët

Bufonët s’u shërbejnë vetëm mbretërve,

që ju i hiqni nga fjalori kibernetik.

Bëni korrigjimin, ju lutem,

sa më shpejt

i jepni

kuptimin e ri!

Mbretër ndoshta s’kanë

t’i bëjnë të gajasen.

Por prapanicat s’mbaruan,

ku si hije

të lëpihen,

të qasen.

Për dy lekë

shiten bufonë.

Të paktën

sa herë të ngrini dorën

fjalë të thoni

dhe në gaboni.

Lepe,

lepe!

T’ju thonë!

English Contents & Different Editorials of the Journal